Exodus 27
И да сотвориши олтарь от древ негниющих, пяти лакот в долготу и пяти лакот в широту: четвероуголен да будет олтарь, и трех лактий высота его.
И да сотвориши роги на четырех углех: из него да будут роги, и покрыеши я медию.
И да сотвориши венец олтарю: и покров его, и фиалы его, и вилицы его, и кадилник его, и вся сосуды его да сотвориши медяны.
И да сотвориши ему огнище на подобие мрежи медяно: и сотвориши огнищу четыри колца медяна на четыри страны,
и подложиши я под огнище олтаря снизу, и будет огнище до среды олтаря.
И да сотвориши олтарю носила от древес негниющих, и окуеши я медию,
и вложиши носила в колца: и да будут носила олтарю по бокам, еже подимати его.
Тощь, дощатый сотвориши его: по показанному тебе на горе, тако сотвориши его.
И да сотвориши двор скинии: на стране, яже к югу, завесы двора из виссона сканаго: долгота сто лакот стране единей:
и столпы их двадесять, и стояла их двадесять медяна, и крючки их, и верхи их сребряны.
Такожде на стране, яже к северу, завесы сто лакот в долготу, и столпы их двадесять, и стояла их двадесять медяна, и крючки их, и верхи столпов, и стояла их посребрена сребром.
Широта же двора, яже к морю, опоны пятьдесят лакот: столпы их десять, и стояла их десять.
И широта двора, яже к востоку, завесы пятьдесят лактий: столпы их десять, и стояла их десять.
И пятьнадесять лакот высота опон стране единей: столпы их три, и стояла их три:
и стране вторей опон пятьнадесять лакот высота: столпы их три, и стояла их три.
И вратам двора завеса двадесять лакот в высоту, от синеты и багряницы, и червленицы сканыя и виссона сканаго пестрением швенным: столпы их четыри, и стояла их четыри.
Вси столпы двора окрест окованы сребром, и верхи их сребряны, и стояла их медяна.
Долгота же двора сто на сто, и широта пятьдесят на пятьдесят, и высота пяти лактий от виссона сканаго: и стояла их медяна.
И все устроение, и вся орудия, и гвозди двора медяны.
И ты заповеждь сыном Израилевым, и да возмут тебе елей от масличия без дрождей чист изжат в светение, да горит светилник всегда.
В скинии свидения вне завесы, яже над заветом, возжигати будет его Аарон и сынове его, от вечера даже до утра, пред Господем, законно вечно в роды вашя от сынов Израилевых.