Exodus 35
И собра Моисей весь сонм сынов Израилевых и рече к ним: сия словеса, яже глагола Господь творити я:
шесть дний сотвориши дела, в день же седмый почиеши, свята суббота, покой Господу: всяк творяй дело в ню, да умрет:
да не возгнетите огня во всех домех ваших в день субботный: Аз Господь.
И рече Моисей ко всему сонму сынов Израилевых, глаголя: сие слово, еже завеща Господь глаголя:
возмите от себе самих участие Господу: всяк по воли сердца своего да принесет начатки Господу, злато, сребро, медь,
синету, багряницу, червленицу сугубу спрядену, и виссон сканый и волну козию,
и кожы овни очервлены, и кожы сини, и древеса негниюща,
и елей во свещение, и фимиам в елей помазания, и в сложение фимиама:
и камени сардийски, и камени в ваяние на ризу верхнюю и на подир:
и всяк премудрый сердцем в вас шед да делает вся, елика заповеда Господь:
скинию и завесы, и покровы и разворы, и колки и вереи, и столпы и стояла:
и кивот свидения и носила его, и очистилище его и завесу, (и опоны двора, и столпы его, и камени смарагдовы, и фимиам и елей помазания,)
и трапезу и носила ея, и вся сосуды ея, и хлебы предложения, (и олтарь и вся сосуды его,)
и светилник света и вся сосуды его, и светила его и елей светилный,
и олтарь кадилный и носила его, и елей помазания, и фимиам сложения, и завесу дверий скинии,
и олтарь всесожжения, и огнище его медяно и носила его, и вся сосуды его, и умывалницу, и стояло ея,
и опоны двора, и столпы его и стояла его, и завесу дверий двора,
и колки скинии, и колки двора, и ужы их:
и ризы святыя Аарона жерца, и ризы, в нихже служити имут во святем, и ризы сыном Аароновым священства (и елей помазания, и фимиам сложения).
И изыде весь сонм сынов Израилевых от Моисеа.
И принесоша кийждо, яже возлюби сердце их, и якоже возмнеся души их, принесоша участие Господу на вся дела скинии свидения, и на вся сосуды ея, и на вся ризы святилища:
и принесоша мужие от жен своих, кийждо, якоже помысли умом, принесоша печати и усерязи, и перстни и пленицы, и мониста и всяк сосуд злат: и вси елицы принесоша участие злата Господу,
и всяк у негоже обретеся синета и багряница, и червленица и виссон, и кожы сини и кожы сини очервлены, (и кожы козия) принесоша:
всяк отделяяй участие, сребро и медь, принесоша участия Господу: и у нихже обретошася древеса негниющая, на вся соделования сосудов принесоша:
и всяка жена мудрая умом рукама прясти, принесе пряденая, синету и багряницу и червленицу и виссон:
и вся жены, имже возлюбися во уме их, хитростию спрядоша волну козию:
и князи принесоша камени смарагдовы и камени на совершение ризе верхней, и на слово,
и на сложение, и на елей помазания, и на сложение фимиама:
и всяк муж, или жена, имже наносяше ум их, вшедшим творити вся дела, елика заповеда Господь творити я Моисеом, принесоша сынове Израилевы участие Господу.
И рече Моисей сыном Израилевым: се, нарече Бог именем Веселеила сына Уриина, сына Орова, от племене Иудина,
и наполни его Духа Божия, премудрости и разума, и умений всех,
архитектонствовати во всех делесех древоделания, творити злато и сребро и медь,
и ваяти камени, и делати древо, и творити по всему делу премудрости:
и преуспевати даде во уме ему и Елиаву Ахисамахову, от племене Данова:
и наполни их премудрости, ума, еже разумети творити вся дела святыни, ткания и пестрения ткати червленицею и багряницею и виссоном, творити всякое дело художества различна.